Yr Wyddgrug yw tref sirol hanesyddol Sir y Fflint ac mae’n dref farchnad ffyniannus yng nghalon yr ardal leol. Mae’r dref yn gartref i fwy na 10,000 o drigolion ac mae hefyd yn gwasanaethu cymuned lawer ehangach, gyda phobl o’r pentrefi cyfagos a’r ardaloedd gwledig yn dod i’r Wyddgrug i siopa, i gael addysg, cyflogaeth, hamdden, gwasanaethau a gweithgareddau cymunedol.

Mae gan yr Wyddgrug hunaniaeth gref a nodedig, sy'n cyfuno ei hanes a'i threftadaeth â chanol tref brysur a bywiog. Mae ein marchnad stryd boblogaidd, ynghyd â’r farchnad da byw, yn parhau traddodiad hir y dref fel canolfan fasnach bwysig ac yn dod â thrigolion ac ymwelwyr i mewn i galon yr Wyddgrug drwy gydol y flwyddyn.

Mae’r dref hefyd yn gartref i amrywiaeth wych o fusnesau annibynnol, grwpiau cymunedol, ysgolion, clybiau chwaraeon a sefydliadau, ynghyd â chyfleusterau diwylliannol a hamdden sy’n cynnwys Theatr Clwyd, un o leoliadau celfyddydol a diwylliannol mwyaf blaenllaw Cymru.

Mae Cyngor Tref yr Wyddgrug yn falch o chwarae ei ran i gefnogi’r dref a’i chymuned. Rydym yn gweithio ochr yn ochr â Chyngor Sir y Fflint, sefydliadau lleol, busnesau, grwpiau cymunedol a phartneriaid eraill i gefnogi prosiectau, digwyddiadau a mentrau ac i helpu i gyflawni’r canlyniadau gorau posibl i’r Wyddgrug.

P’un a ydych yn byw yma, yn gweithio yma, yn rhedeg busnes, yn ymweld â’r dref neu’n rhan o un o’r cymunedau niferus o amgylch yr Wyddgrug, rydym am i’r Wyddgrug barhau i fod yn dref groesawgar, fywiog a llwyddiannus.

I gael gwybodaeth i ymwelwyr, hyrwyddo canol y dref, busnesau lleol, digwyddiadau a’r hyn sydd ymlaen yn yr Wyddgrug, ewch draw i Yr Wyddgrug yn Llwyr.