Pwy sy'n Ymdrin â Cheisiadau Cynllunio?

Mae penderfyniadau cynllunio’n siapio dyfodol ein tref. O gartrefi a busnesau newydd i gyfleusterau cymunedol a mannau cyhoeddus, mae cynllunio’n helpu i sicrhau bod y datblygiad yn briodol, yn gynaliadwy ac yn fuddiol i drigolion.

Pwy sy'n Ymdrin â Cheisiadau Cynllunio?

Cyngor Sir y Fflint yw'r Awdurdod Cynllunio Lleol ar gyfer yr Wyddgrug ac mae'n gyfrifol am wneud penderfyniadau am geisiadau cynllunio a materion rheoliadau adeiladu o fewn y dref.

Os ydych chi'n cyflwyno cais cynllunio, yn ceisio cyngor cynllunio neu'n dymuno gwneud sylwadau ar gynnig, dylech gysylltu â Chyngor Sir y Fflint yn uniongyrchol.

Mae porth cynllunio'r Cyngor Sir yn caniatáu i drigolion, busnesau a datblygwyr wneud y pethau hyn:

• Gweld ceisiadau cynllunio a dogfennau ategol.
• Tracio cynnydd ceisiadau.
• Cyflwyno sylwadau am gynigion.
• Gweld penderfyniadau a hysbysiadau cynllunio.

Rôl Cyngor Tref yr Wyddgrug

Er nad yw Cyngor Tref yr Wyddgrug yn gwneud penderfyniadau cynllunio, mae'n chwarae rôl bwysig o ran cynrychioli barn y gymuned leol.

Ymgynghorir â Chyngor y Dref ar bob cais cynllunio sy'n effeithio ar yr Wyddgrug ac mae'n ystyried pob cynnig yn ofalus cyn cyflwyno ei sylwadau i Gyngor Sir y Fflint. Mae'r sylwadau hyn yn helpu i sicrhau bod gwybodaeth leol a buddiannau cymunedol yn cael eu hystyried yn rhan o'r broses o wneud penderfyniadau.

Sut yr Ystyrir Ceisiadau Cynllunio

Ymgynghorir â Chyngor Tref yr Wyddgrug mewn perthynas â cheisiadau cynllunio ac ymgynghoriadau sy'n ymwneud â chynllunio sy'n effeithio ar y dref. Er nad Cyngor y Dref yw'r awdurdod sy'n gwneud y penderfyniadau, mae'n chwarae rôl bwysig o ran sicrhau bod barn leol yn cael ei chynrychioli drwy gydol y broses gynllunio.

Ystyrir ceisiadau cynllunio gan Bwyllgor Cynllunio'r Cyngor, sy'n cyfarfod pob pedair wythnos yn fras i adolygu ceisiadau cynllunio, cynigion datblygu ac ymgynghoriadau a dderbynnir gan Gyngor Sir y Fflint.

Mae'r Pwyllgor Cynllunio’n gweithredu o dan ei Gylch Gorchwyl cymeradwy i ystyried effaith bosibl y cynigion ar y dref, ei thrigolion a'r gymuned ehangach cyn cyflwyno sylwadau ar ran Cyngor Tref yr Wyddgrug.

Mae'r Pwyllgor yn helpu i sicrhau bod gwybodaeth leol a buddiannau’r gymuned yn cael eu cynrychioli a bod y Cyngor yn ymateb i faterion cynllunio o fewn yr amserlenni ymgynghori gofynnol.

Yn dilyn pob cyfarfod, cyflwynir sylwadau'r Cyngor yn ffurfiol i Gyngor Sir y Fflint yn rhan o'r broses ymgynghoriad cynllunio.

Gellir gweld manylion y sylwadau a gyflwynwyd gan Gyngor Tref yr Wyddgrug yng nghofnodion cyfarfodydd y Pwyllgor Cynllunio.

Diweddaru eich Gwybodaeth

Gall preswylwyr sydd eisiau dilyn materion cynllunio sy'n effeithio ar yr Wyddgrug:

• Weld y ceisiadau cynllunio cyfredol drwy borth cynllunio Cyngor Sir y Fflint.
• Mynychu cyfarfodydd y Cyngor Tref lle caiff ceisiadau cynllunio eu hystyried.
• Darllen cofnodion cyfarfodydd y Cyngor Tref a'r Pwyllgor Cynllunio i weld y sylwadau a'r arsylwadau sy’n cael eu cyflwyno gan y Cyngor.

Trwy gymryd rhan yn y broses gynllunio, gall preswylwyr helpu i siapio datblygiad yr Wyddgrug yn y dyfodol a sicrhau bod eu barn yn cael ei chlywed ar faterion sy'n effeithio ar y gymuned.